Jun 20, 2018

ഏറ്റവും പ്രിയപ്പെട്ട വസന്തങ്ങളുടെ  നേരങ്ങളെ  
കഴിഞ്ഞ കാലങ്ങളിൽ നിന്ന് 
തുന്നിയെടുക്കുകയാണ് ഞാനിപ്പോൾ , പക്ഷെ 
മേപ്പിൾ മരങ്ങളുടെ ഈ നഗരത്തിൽ 
160  കെഎം സ്പീഡിൽ ചുവന്ന  നിറമുള്ള
ഫോക്സ് വാഗൺ 
പൊടിപറത്തി പായിക്കുകയാണ് ഞാനെന്ന്  
നിങ്ങൾ കണ്ടെത്തിയേക്കാം 
രണ്ടു തരം മുന്തിയ ധാരണകളുടെ 
പ്രശ്നമാണിതെന്ന് എനിക്കറിയാം 
എന്നതിനാൽ ഞാനത് കാര്യമാക്കുന്നില്ല 
11.30 ന്റെ ഡിന്നർ പാർട്ടിക്ക് വേണ്ടി 
സവാള അരിയുകയാണ് നിങ്ങളെന്നു 
ഞാൻ കരുതിവെയ്ക്കുന്നതോടെ 
ഇതാ ഈ സമസ്യ 
ഇവിടെ പൂർത്തീകരിക്കപ്പെടുന്നു 
എങ്കിൽ 
നിങ്ങൾ കവിതയെഴുതിക്കോളൂ 
ഞാനീ പ്രേമത്തിനെ പൂക്കളുടെ 
ഇതളടർത്തൽ തുടരട്ടെ..

May 23, 2018

ഫീലിംഗ്സ് കമ്പനി .പബ്ലിക് ലിമിറ്റഡ്

ഒരിക്കൽ പോയ് വഴി താണ്ടി വീണ്ടും
സെക്കൻഡ് സൂചികൾ
പാഞ്ഞിട്ടും മാഞ്ഞിട്ടും
ഉറക്കത്തിന്റെ കാറ്റ്
വന്നു താഴ്ത്താത്ത ജാലകങ്ങളുമായി
തുറന്ന കണ്ണുകൾ പാകിയ
തടിച്ച പുസ്തകത്താൾ
ഇടംകൈ കൊണ്ട് മറിക്കുമ്പോൾ
നഗരത്തിലെ മഴ പോലെ
വടക്കേസ്റ്റാൻഡിൽ വെച്ച്
കരണത്തടിച്ചവളെ ഓർത്തു.
അർദ്ധരാത്രി
വിമാനം കയറാൻ പോയ കാമുകൻ
കാലം കഴിഞ്ഞിട്ടും തിരികെ വന്നില്ലെന്ന്
അതിനു ഞാനെന്തു പിഴച്ചു എന്ന്
ചോദിക്കാനാഞ്ഞതും
ഇടത് കണ്ണിൽ നിന്നും പൊന്നീച്ച പറന്നു
പിന്നെ ഉള്ളിൽ നിറയേ തേനീച്ചകളായിരുന്നു
അതെ രാത്രിയിൽ തുറന്നു വെച്ച മധുശാല
പറ്റുപടിക്കാരെ മറന്നിരുന്നു
ഓ മറക്കുന്നവരെ ഒന്നും 
മറക്കാൻ പറ്റുന്നില്ല .
ഇത് വരെ തെറ്റാതെ
എട്ടിന്റെ പെരുക്കപ്പട്ടിക ചൊല്ലിപ്പഠിച്ചിട്ട്
കഞ്ഞികുടിച്ചോളാമെന്ന് ചെക്കൻ പറഞ്ഞിട്ടും
രാവിലെ നേരത്തെ പശുവിനെ കറക്കേണ്ടതിനാൽ
ടൈംപീസ് തിരിച്ചുവെച്ചു വറീതേട്ടൻ
സ്വന്തം ശരീരത്തിന് മേൽ
ഉറക്കത്തിന്റെ തിരശീല വിരിക്കുന്നു
അന്തി വരെ എല്ലൊടിയെ
പണിയെടുത്ത് തളർന്നതിനാലാണ്
അയാളങ്ങനെ ചെയ്തത്.
ആ പാവം അങ്ങനെ ഉറങ്ങിപ്പോയിരിക്കുന്നു
വിമാനം കയറിപ്പറന്ന കാമുകിയെ കുറിച്ചോ
പട്ടിണിയാണേലും പഠിക്കാൻ കൊതിക്കണ
ചെക്കനെ കുറിച്ചോ
തളർന്നുറങ്ങുന്ന വറീതേട്ടനെ കുറിച്ചോ
അല്ല
നാളെ രാവിലെ ഒരു നസ്രാണി കറക്കാൻ പോകുന്ന
പശുവിനെ കുറിച്ചാണ് നിങ്ങൾ ചിന്തിക്കാൻ തുടങ്ങുന്നതെങ്കിൽ ഓർക്കുക
നിങ്ങൾക്കുള്ളിൽ  ദേശസ്നേഹം 
രണ്ടര ടേബിൾ സ്പൂൺ കൂടുതലാണ്

(2016 or before)
മരണം വഴി വളഞ്ഞു പോകുകയാണ് 
റിച്ചാർഡ് ലോപ്പസ് എന്ന 
മാധവൻകുട്ടി.
അയാൾക്കിനിയും ജീവിതം 
ഒത്തിരി ദൂരം ഉരുട്ടിക്കൊണ്ടിരിക്കുവാനുണ്ട്.
**
കെട്ടിടങ്ങൾക്കിടയിൽ
ചാരിവെച്ച വഴിവിളക്കുകൾ
നിറഞ്ഞ നഗരം ,
ഇപ്പോഴയാൾ
തന്റേതാണ് എന്ന് പറയുന്നില്ല.
അത് അങ്ങനെ തന്നെയാണെങ്കിൽ പോലും.!
നമ്മൾ പാർത്തൊരു നഗരം ചുമന്ന്
അവർ  പോകുമ്പോൾ
നിരത്തുകളിലെ കെട്ടിടങ്ങളുടെ
കിളിവാതിലിലൂടെ നോക്കുന്നവരുടെ 
ഒരു വലിയൊരു കൂട്ടം ആകാംക്ഷകളെ
എവിടെയാണെവിടെയാ-
ണെവിടെ നിന്നോ വെന്നെങ്ങോട്ടോ
പോകുമെന്റെ സ്വന്തം,
നിന്റെ പേരുള്ള  കാറ്റുകൾ
എന്ന പോലെ ജിജ്ഞാസ -
പേറി വരുന്ന നോട്ടങ്ങൾ
മുന്പ് നഗരമിരുന്ന ഇടത്തിലേക്ക്
പായുന്നുവെങ്കിൽ
എന്തുണ്ടവിടെ നഗരത്തിനു പകരം ?
എന്ന് തോന്നുന്നെങ്കിൽ
ഐസുപോൽ തണുത്തുറഞ്ഞ ശൂന്യത
പുതിയ കാറ്റിൽ പഴയ നഗരാതുരത
ഇവയല്ലാതില്ലോന്നും പുതിയവ വേറെ 
എങ്കിലുമാവതില്ല  മറക്കുവാൻ
പഴയ നഗരം നിന്നയിടങ്ങളെ
എന്ന് വന്നലെന്തു ചെയ്യും
വിഷാദത്തിനു വശപ്പെടാതിരിക്കാൻ 
പോപ്പ് സംഗീതം ശ്രവിക്കാം 
ശമനമുണ്ട്,അതെ 
 മിസ്റ്റർ ഡറൂല
എനിക്കുമിപ്പോൾ
തോന്നുന്നുണ്ട് നിങ്ങള്ക്ക് തോന്നിയ പോൽ
മുന്തിയയിനം  നഷ്ടബോധം
യെസ്!
ഐ ഒണ്‍ലി മിസ്സ്‌ ഇറ്റ്‌ വെൻ ആം ബ്രീതിംഗ് 

May 2, 2018

രണ്ടാം ഭാവം

രാത്രിയിൽ, 
അർദ്ധ നഗ്നനായി 
പുഷ് അപ്‌സ് എടുക്കുമ്പോൾ 
മഴക്കാടുകളെ കുറിച്ചും 
യേശു ക്രിസ്തുവിനെ കുറിച്ചും ഓർത്തു 
വഴിയറിയാത്ത നക്ഷത്ര ദമ്പതികൾക്കൊരിക്കലും 
കാലിത്തൊഴുത്തോ മരക്കുരിശോ 
കാണാനൊക്കില്ല 
അതെന്താണങ്ങനെ ?
ഹോ എന്തൊരാലോചന !
വഴുതിയതാ മുഖമടിച്ചു വീണു 
പീഡന പർവ്വത്തിന്റെ മുൾക്കിരീടം 
മുടിനാരുകൾക്കിടയ്ക്ക് ഒഴുകിയിറങ്ങുന്നു 
കണ്ണ് നിറഞ്ഞു നീറുന്ന കാഴ്ചകൾ 
ബ്ലഡി മേരി എന്ന 
തക്കാളിച്ചാറിൻചഷകം തന്നവന് സ്തോത്രം 
ബോധം വീണ്ടും റിക്ഷ കയറി മറഞ്ഞുപോയി.
പുലർകാലേ വന്ന പാടെ 
തീരുമാനിച്ചു കഴിഞ്ഞു 
ചിന്തിച്ചു പോവരുത് 
പുഷ് അപ് എടുക്കുമ്പോഴോ 
പൂവ്വമ്പഴം തിന്നുമ്പോഴോ പോലും.


ഓഫ് : ചിന്തയാണ് എല്ലാ  കുഴപ്പങ്ങൾക്കും കാരണം എന്ന് ഗോവിന്ദ്ജി പറയാറുണ്ട്.

Nov 16, 2017

ഈ നിമിഷത്തിൽ നിന്ന്

 നഗരത്തിൽ ഇത് അവസാന രാത്രിയാണ്, പക്ഷെ അത് കൊണ്ട് പ്രത്യേകിച്ചൊന്നുമില്ല . 
  ശൈത്യകാലം വന്ന് കിടുക്കി  വിറപ്പിക്കുന്ന തണുപ്പ് കൊണ്ട് ആലിംഗനം ചെയ്യുന്ന സമയത്ത് ഒരു മഫ്ളർ ചുറ്റിത്തരും പോലെയോ, ഓറഞ്ച് പോലൊരു  ഒരു സായം  സന്ധ്യ കൈനീട്ടി കവിളിൽ തന്റെ നിറങ്ങൾ ഓരോന്നും തേച്ചു തരുന്നത് നോക്കി നിന്ന് ചിരിക്കുന്നത് പോലെയോ, പെരും മഴയത്ത്  ജലം നിറഞ്ഞ തെരുവുകളിലേക്ക്  കൂട്ടിക്കൊണ്ടുപോകുകയോ,  ഇരുണ്ട വലിയ കെട്ടിടങ്ങൾ കൊണ്ട് കുനിഞ്ഞു ചുംബിക്കുകയോ ഒക്കെ ചെയ്തിട്ടുള്ള നഗരമാണിത് എന്നത് കൊണ്ട് മാത്രമാണ് അങ്ങനെ പറയുന്നത്. അത് കൊണ്ട് മാത്രം .അങ്ങനെ , ഉള്ളിലേക്ക്പതിയെ തുറക്കുന്ന  വാതിലുകൾ ഉള്ള  പണ്ടിക ശാലകൾ ദേഹത്തിന്റെ ഓരോ മുക്കിലും  നിറച്ചു വെച്ച നഗരം , ഇനിയുള്ള ദിവസങ്ങളിൽ നിന്ന് മറിച്ചു കളയുകയാണ്   
​         ഹൃദയത്തിലെ കമ്പിറാന്തൽ തിരി താഴ്ത്തുന്നു , നിറഞ്ഞും പാ തിയൊഴിഞ്ഞുമിരിക്കുന്ന സ്ഫടികകുപ്പികൾക്കും പിച്ചള കോപ്പകൾക്കും ഇടയിൽ നിന്ന് ഞാൻ തലയുയർത്തുകയായി.ഈ നേരം ആഹാ ,  ​സിയാ മിർസാ തന്റെ  ജുഗൽ ബന്ദി ആരംഭിച്ചിരിക്കും 

'' ഖുരാ ഹുവാ ദിൽ , 
  തും സെ ജോ ബാത് ഹുയെ..''   

മഞ്ഞിൽ വിരിഞ്ഞ താഴ്വാരത്തിലേക്ക് അയാൾ നക്ഷത്രങ്ങളെ വലിച്ചു കൊണ്ട് വരുന്നു , അയാളുടെ വിരലുകളിൽ ചുംബിച്ചു പൊള്ളിക്കണം.
                വീണ്  കിടക്കുന്ന നീളൻ ചെമ്പൻ മുടിയിഴകൾക്കിടയിലൂടെ ഞാൻ ജനലിലൂടെ പുറത്തേക്ക് നോക്കി. സമയം കൃത്യം . അവളുടെ യാത്രകളുടെ  തീമഞ്ഞ നിറമുള്ള ട്രാം തലകുലുക്കി കടന്നു പോവുന്നു. മുഖമൊരു നദിയാവുന്നു ചുറ്റും ഉപ്പു പരക്കുന്നു , ധൃതിയിൽ തിരിഞ്ഞപ്പോൾ  കൈ തട്ടി മറിഞ്ഞ വീഞ്ഞ് ചഷകത്തെയോർത്ത് അടുത്തിരിക്കുന്നവൻ മുതുകിൽ ആഞ്ഞു പ്രഹരിക്കുന്നു. ഡ്രംസ് ന്റെ പഴയ താളം ഒരു വികൃതിപ്പയ്യന്റെ കൈയിൽ നിന്ന് വഴുതി വീഴുന്ന പോലെ ഒരാഘാതം എന്റെ ദേഹത്ത് പരക്കുന്നു കോപത്തിനോ വിഷമത്തിനോ പകരം എനിക്കയാളെ ആലിംഗനം ചെയ്യാൻ തോന്നുന്നു,  നിറയുവോളം 'കൈയ്പിറോസ്‌ക' വാങ്ങി നൽകുന്നു . പശ്ചാത്താപം കൊണ്ടയാൾ ലഹരി മണമുള്ള മുത്തങ്ങൾ കൊണ്ടെന്റെ ചുമലിലേക്ക് ചാഞ്ഞ  നിമിഷം അയാളെ മറന്നു, ഞാൻ വണ്ടി പോയ , ഞെരുങ്ങിയ കാൽത്തളകൾ അണിഞ്ഞവൾ കാലം കവച്ചു വെച്ച് കടന്നു പോയ, വഴിയിലേക്ക് നോക്കി..  ഹഹ  നഗരമൊരു നിർമല മന്ദഹാസം , എന്റെ ജീവൽപ്പക്ഷികൾ കുതറി വീഴിച്ച തൂവലുകൾ കൊണ്ട് നിനക്കാലിംഗനം. നിന്നെ കാലത്തിനു പുറത്തക്ക് കൊണ്ട് പോവുകയാണ് ഞാൻ ഈ പാതി രാത്രിക്ക് ശേഷം.................................... .............................................................................................

Nov 4, 2017

പ്രിയപ്പെട്ട സാൽമൻ മസല്ലാ ,

അവളുടെ കൈരേഖകളിലെ 
കിളിക്കൂട്ടിൽ നിന്ന് നിങ്ങൾ തുറന്നു വിട്ട 
മുഴുവൻ കിളികളും 
എനിക്കുള്ളിലേക്ക്- 
ചിറകടിച്ചുവന്നുവെന്നത്  
സസന്തോഷം അറിയിക്കുന്നു 
ചിറകടിയുടെ താളത്തിൽ 
പതിയെ  പൊഴിഞ്ഞ തൂവലുകൾ പെറുക്കി 
നിങ്ങളുടെ ഹൃദയത്തെ അണിയിക്കാൻ 
ഞാനൊരു കിരീടം തുന്നിവെച്ചിട്ടുണ്ട് 
നിശ്ശബ്ദതതയുടെ ഒഴിഞ്ഞ സ്ഥലികളിലേക്ക് 
കാലെടുത്തു വെയ്ക്കുന്ന ആ നിമിഷം 
അത് ഞാൻ നിങ്ങളെ അണിയിക്കും 
മാറുന്ന ഋതുക്കൾക്കായി നോക്കിയിരിക്കുന്നു 


                                    എന്ന് സ്വന്തം 


                                          Khana Farigha 

ഏറ്റവും പ്രിയപ്പെട്ട വസന്തങ്ങളുടെ  നേരങ്ങളെ   കഴിഞ്ഞ കാലങ്ങളിൽ നിന്ന്  തുന്നിയെടുക്കുകയാണ് ഞാനിപ്പോൾ , പക്ഷെ  മേപ്പിൾ മരങ്ങളുടെ ഈ നഗ...