Aug 20, 2017

ആരാണീ പ്ലസ്സർ എന്ന ഗൂഗിൾ പ്ലസ് പരിപാടിയിലെ എന്നോടുള്ള ചോദ്യങ്ങളും അതിനോടുള്ള ഉത്തരങ്ങളും ഞാനും . സൂരജ് ബ്രോ ക്കു സ്തുതി )

1. സ്വയം നിർവ്വചനം ? (ക്ലൂസ് കൊടുക്കാതെ)

ഒരു നിർവചനത്തിലേക്കും മെരുങ്ങാതിരിക്കാൻ സദാ ശ്രമിക്കുന്ന ജീവി



2. മലയാളികളുടെ മണികിലുക്കം കലാഭവൻമണി നമ്മെ വിട്ടുപിരിഞ്ഞിട്ട് ഇന്ന് ഒരു വർഷം തികയുന്നു. ഈയവസത്തിൽ അദ്ദേഹത്തെപ്പറ്റി ഓർത്തെടുക്കാമോ...? അദ്ദേഹം പാടിയ ഏത് ഗാനമാണ് താങ്കൾ ഇന്നും നെഞ്ചോട് ചേർത്തു വെച്ചിട്ടുള്ളത് ?

കടന്നു വന്ന വഴികളെ കുറിച്ച് ആഗ്രഹങ്ങളെയും ദരിദ്രനായി നേരിട്ട അപമാനങ്ങളെയും കുറിച്ച് സമ്പന്നതയുടെ മടിത്തട്ടിൽ ഇരുന്നു പറയുമ്പോഴും കണ്ണ് നിറയുന്ന ആൾ. ഒരോണത്തിന്‌ സൺ ഗ്ലാസ് വെച്ച് വന്ന മാണിയോട് താര ജാടയാണോ എന്ന് ചോദിച്ച മാധ്യമ പ്രവർത്തകനോട് മാണി പറഞ്ഞത് , അല്ല ചങ്ങാതീ രണ്ടെണ്ണം അടച്ചിട്ടുണ്ട് കണ്ണ് കലങ്ങിയിരിക്കാവും അതാൾക്കാര് കാണണ്ടല്ലലോ എന്ന് വെച്ചിട്ടാണ് എന്ന് അത് പോലെ പോയന്റ് ബ്ലാങ്കിൽ വെച്ച് എല്ലാവർക്കും സഹായം ചെയ്യുന്നത് പേരിനു വേണ്ടിയാണോ എന്ന് ചോദിച്ചപ്പോൾ പറഞ്ഞത് ഞാനിതു ചാവുമ്പോൾ കെട്ടിപ്പൊതിഞ്ഞു കൊണ്ട് പോവില്ല , അതോണ്ട് ഞാൻ പണിയെടുത്തുണ്ടാക്കുന്ന പണം ഇഷ്ടമുള്ളവർക്ക് കൊടുക്കും എന്നാണു. മനുഷ്യനാണ്
കാഴ്ച എന്ന സിനിമയിൽ ''തിര തിര'' എന്ന പാട്ട് എനിക്കിഷ്ടമാണ്

3. ആതിരപ്പള്ളി പ്രൊജക്റ്റുമായി സർക്കാർ മുന്നോട്ട് പോവുകയാണ്. അനുകൂലിക്കുന്നവരേക്കാൾ പ്രതികൂലിക്കുന്നവരാണ് കൂടുതൽ എന്ന് നമുക്കറിയാം. ഈ വിഷയത്തിൽ താങ്കളുടെ അഭിപ്രായം ?

പ്രതികൂലിക്കുന്നു. അതിരപ്പിള്ളി പ്രോജക്ട് ന്റെ കാര്യത്തിൽ മാത്രമല്ല. Ecological disaster  നു കാരണമായേക്കാവുന്ന ഏതു തരം പ്രോജക്ടുകളോടും ഒരു തരത്തിലും അനുകൂലിക്കാൻ കഴിയില്ല 

4. മാർച്ച് 8, അന്താരാഷ്ട്ര വനിതാദിനം.... സ്ത്രീകളുടെ ശക്തി വിളിച്ചോതി അവർക്കൊരുപാട് ധൈര്യം പകർന്നുകൊടുത്ത ഒരുപാട് വനിതാദിനങ്ങൾ കടന്നുപോയിട്ടുണ്ട്. താങ്കളുടെ കാഴ്ചയിൽ, ഇന്ന് കേരളത്തിലെ സ്ത്രീകൾ സ്വയംപര്യാപ്തരാണോ? സ്വയം ജോലി ചെയ്ത് കുടുംബം പുലർത്താനല്ലാതെ, സമൂഹത്തിൽ സജീവമായി ഇടപഴകുകയും സധൈര്യം രാത്രികാലങ്ങളിൽ ഒറ്റക്ക് സഞ്ചരിക്കുകയും ചെയ്യുന്ന സ്ത്രീകളുടെ എണ്ണം കൂടി വരുന്നതായി അറിയാൻ കഴിയുന്നുണ്ടോ ? ഈ വനിതാദിനത്തിൽ സ്ത്രീകളോട് താങ്കൾക്ക് പറയാനുള്ളത് എന്താണ് ?

സമൂഹത്തിൽ സജീവമായി ഇടപഴകുകയും സധൈര്യം രാത്രികാലങ്ങളിൽ ഒറ്റക്ക് സഞ്ചരിക്കുകയും ചെയ്യുന്ന സ്ത്രീകളുടെ എണ്ണം കൂടി വരുന്നുണ്ട് അത് വളരെയധികം സന്തോഷിപ്പിക്കുന്ന ഒന്നുമാണ്. ഏതെങ്കിലും ഒരു ദിനം ആചരിക്കുന്നത് കൊണ്ടോ ആ ദിനത്തിന് വേണ്ടിയോ ആരും എന്തെങ്കിലും ഉപദേശങ്ങളോ ആഹ്വാനങ്ങളോ സ്ത്രീകൾക്ക് നൽകേണ്ട കാര്യമുണ്ടെന്നു ഞാൻ കരുതുന്നില്ല . അങ്ങനെ ഒരു ഔദാര്യമൊന്നും ഏതെങ്കിലും സ്ത്രീകൾ ആഗ്രഹിക്കുന്നുമുണ്ടാവില്ല. അവർക്ക് നിലപാടുകൾ ഉണ്ട് വിഷൻ ഉണ്ട് അനുദിനം അവർ അതിലേക്ക് വളരുകയോ അപ്ഗ്രഡ് ചെയ്യപ്പെടുകയോ ചെയ്യുന്നുമുണ്ട് അത് കൊണ്ട് തന്നെ അത്തരത്തിൽ എന്തെങ്കിലും ഉപദേശം നേടി പ്രചോദനം ഉൾക്കൊള്ളേണ്ടവരാണ് സ്ത്രീകൾ എന്നില്ല. വ്യക്തമായി കാര്യങ്ങളെ അപഗ്രഥിക്കാനും അഭിപ്രായം പറയാനും അവർക്കാവും അവരത് ചെയ്യുന്നുണ്ട് എന്നിരിക്കെ അവരെ അതിനനുവദിക്കുകയും(അനുവദിക്കുക എന്ന് പറയുമ്പോ ആരുടെയെങ്കിലും അനുവാദം ലഭിച്ചിട്ട് വേണം അവർക്കതു ചെയ്യാൻ എന്നല്ല , അഭിപ്രായങ്ങൾക്കും ചർച്ചകൾക്കും അവസരം നിഷേധിക്കാതിരിയ്ക്കുക എന്നാണ് ഉദ്ദേശിക്കുന്നത് ) ഏതെങ്കിലും തരത്തിലുള്ള ലേബലിംഗിനോ ആക്ഷേപത്തിനോ വിധേയമാക്കാതിരിക്കുകയും കാലാകാലങ്ങളായി സമൂഹം നൽകുന്ന പ്രിവിലേജുകളായ പുരുഷാധിപത്യം സ്ത്രീകൾക്ക് മേൽ അടിച്ചേൽപ്പിക്കാതിരിക്കാനും ശ്രദ്ധിക്കേണ്ടത് ഞാനടങ്ങുന്ന ഈ സമൂഹമാണ് എന്നാണ് ഞാൻ കരുതുന്നത്. വ്യക്തമായി എന്ന് കരുതുന്നു



5. താങ്കളുടെ ഉള്ളിൽ ഉറങ്ങിക്കിടക്കുന്ന കലാകാരൻ എപ്പോഴൊക്കെയാണ് ഉണർന്നെണീക്കാറുള്ളത് ? നിലാവുള്ള രാത്രികളിൽ നക്ഷത്രങ്ങൾക്കിടയിലൂടെ ചിറകുള്ള കുതിരപ്പുറത്ത് പാറിപ്പറന്ന് പോകാൻ തോന്നിയിട്ടുണ്ടോ ? മഴയും വെയിലുമൊരുമിച്ചുള്ള പകലുകളിൽ കൂട്ടുകാരിയുടെ കൈപിടിച്ച് ആളൊഴിഞ്ഞ കടൽത്തീരത്തുകൂടി നടക്കാൻ തോന്നാറുണ്ടോ ? ഭൂതകാലത്തിലേക്ക് ഊളിയിട്ട് വള്ളിനിക്കറിട്ട പ്രായത്തിലെത്തി, തറവാടിനോട് ചേർന്നുള്ള മാവിൻകൊമ്പിൽ കൂട്ടുകാരോടൊത്ത് വലിഞ്ഞുകയറിയിരുന്ന് പഴുത്തമാങ്ങ തിന്നാൻ തോന്നാറുണ്ടോ?

എനിക്കുള്ളിൽ വല്ലാത്ത പാഷനോടെ കലയെ സമീപിക്കുന്ന ഒരാളുണ്ട് എന്ന് ഞാൻ വിശ്വസിക്കുന്നു എന്നാൽ  അയാൾ ഉറങ്ങിക്കിടക്കുകയും ഏതെങ്കിലും ഒരു മൊമന്റിൽ ചാടിയുണർന്നു എന്തെങ്കിലും സൃഷ്ടിക്കുകയും ചെയ്യുന്നില്ല .. എന്റെ  ഉള്ളിലെ കലാകാരൻ സദാ ഉണർന്നിരുന്നു ലോകത്തിന്റെ ചലനങ്ങൾ ആസ്വദിക്കുന്ന,  അയാൾക്കായോളോടോ ലോകത്തോടോ എന്തെങ്കിലും വിളിച്ചു പറയണം എന്ന് തോന്നുമ്പോൾ മാത്രം അതിനെ പകർത്തി വെയ്ക്കുകയും ചെയ്യുന്ന ഒരാളാണ്.

നിലാവുള്ളതോ ഇല്ലാത്തതോ ആയ ആകാശത്തിൽ ചെരുപ്പിടാതെ വെറുതെ നടക്കണം എന്ന് തോന്നാറുണ്ട് അത് മാത്രമല്ല. ലൈറ്റ് അണച്ച് കിടക്കുമ്പോൾ എന്റെ കട്ടിലിനരികിൽ ഓപ്പറ നടക്കുന്നതായിട്ട് കണ്ടിട്ടുണ്ട്. എന്തിനേറെ തനിച്ചോ ആൾക്കൂട്ടത്തിനിടയിലോ ഇരിക്കുമ്പോൾ നല്ല സുന്ദര സംഗീതം പോലും കേൾക്കാറുണ്ട്.കൂട്ടുകാരിയുടെ കൈ പിടിച്ചല്ല സാധാരണ തോളിൽ കൈ വെച്ചാണ് നടക്കാറ് അത് മഴയോ വെയിലോ എങ്ങനെയും കുഴപ്പമില്ല ഇനി അതുണ്ടെങ്കിൽ വളരെ സന്തോഷം തോന്നാറുണ്ട് . പിന്നെ ഭൂതകാലം പലപ്പോഴും പല മണങ്ങളായിട്ട് ഓർമയിൽ വരാറുണ്ട് പല തരം മാങ്ങകളുടെ കശുമാങ്ങകളുടെ ..സ്ഥിരമായി പാൽ കൊണ്ട് വരുന്ന പത്രത്തിന്റെ പഴയ പത്രങ്ങളുടെ അങ്ങനെ ...


6. ഭാര്യാ ഭർത്താക്കന്മാർ തമ്മിൽ പബ്ലിക് ആയി സ്നേഹപ്രകടനം നടത്തുന്നതിനെ എങ്ങനെ നോക്കിക്കാണുന്നു ? അത് താങ്കളുടെ ലൈഫിൽ പ്രാവർത്തികമാക്കാറുണ്ടോ ?

ഭാര്യാഭർത്താക്കന്മാർ തമ്മിൽ സ്നേഹിക്കട്ടെ അത് തമ്മിൽ തമ്മിൽ മനസിലാവുന്നതിനപ്പുറം സ്ഥലകാലങ്ങൾക്ക് അവിടെ  പ്രസക്തിയില്ല. അവരത് പബ്ലിക്കിലോ അവർക്ക് സൗകര്യപ്പെടുന്ന ഏതിടങ്ങളിലും പ്രകടിപ്പിക്കട്ടെ. പ്രകടനപരത ഏതൊക്കെ അർത്ഥത്തിൽ ആണ് ഉദ്ദേശിച്ചത് എന്നെനിക്കറിയില്ല എങ്കിലും ഈ കോർണീഷിലും പാസ്പോര്ട് ഓഫീസിന്റെ മുൻപിലും ചാലക്കുടി ഹൈവേയിലും  അങ്ങനെ എനിക്കങ്ങനെ ചെയ്യണം എന്ന് തോന്നിയിട്ടുള്ള ഇടങ്ങളിലെല്ലാം)  വെച്ച്  എന്റെ ഭാര്യയെ ഞാൻ ചുംബിച്ചിട്ടുണ്ട്

7. ഇഷ്ട്ടപ്പെട്ട അഞ്ചു വിനോദങ്ങൾ ?
വായന, ഫോട്ടോഗ്രാഫി,  ചിത്രംവര, സിനിമ, എന്തെങ്കിലുമെഴുത്ത്,  യാത്ര ഇതൊക്കെയാണ് ആ വിധത്തിൽ ഉള്ളത്. കൂടുതലായും  ഒരു സമയം ഒരെണ്ണം മൂത്തു നിൽക്കും അതായത് അഞ്ചു വിനോദം എന്ന നിലക്കാണേൽ ഇപ്പോഴത്തെ മൈൻഡ് വെച്ചിട്ട് 1.വായന  2.വായന 3.വായന 4.വായന 5.വായന ഇങ്ങനെ .. അതങ്ങനെ മാറിക്കൊണ്ടിരിക്കും  .

8. ലൈഫിൽ വല്ലപ്പോഴുമുണ്ടാകാറുള്ള ഏകാന്തത എങ്ങനെയാണ് കൊണ്ടാടപ്പെടുന്നത് ?

ലൈഫിൽ വല്ലപ്പോഴുമുള്ള ഏകാന്തതയോ ?, ലൈഫിൽ മിക്കപ്പോഴുമുള്ള ഏകാന്തത എന്ന് ഞാനതിനെ തിരുത്തുന്നു. എന്നെ സംബന്ധിച്ച് ഏകാന്തത ഞാൻ വളരെ ഇഷ്ടപ്പെടുന്ന ഒന്നാണ്. പുസ്തകം സിനിമ പിന്നെ തനിയെയുള്ള നടത്തം അല്ലെങ്കിൽ ഏതെങ്കിലും കഫെകളിൽ പോയിരുന്നു ചായയും പുസ്തകവും അങ്ങനെയൊക്കെ സാധാരണ പരിപാടികൾ  
ഓഫ് : ഒരുമുറിയിൽ ശാന്തമായി തനിച്ചിരിക്കാൻ കഴിയാത്ത മനുഷ്യന്റെ കഴിവില്ലായ്മയാണ് ഇന്ന് മനുഷ്യകുലത്തിന്റെ എല്ലാ പ്രശ്നങ്ങൾക്കും കാരണം എന്നാണു പാസ്കൽ പറഞ്ഞിട്ടുള്ളത് . സത്യമാണത് എന്ന് തോന്നിയിട്ടുണ്ട് 

9. പൈങ്കിളി സാഹിത്യം എന്നൊരു വിഭാഗം ഉണ്ടെന്ന് കരുതുന്നുണ്ടോ? ഉണ്ടെങ്കിൽ അതിനോടുള്ള കാഴ്ചപ്പാടെന്താണ് ?

അങ്ങനെ ഒരു വിഭാഗം നമുക്കുമുന്നെയുള്ളവർ ഉണ്ടാക്കിവെച്ചിട്ടുണ്ടല്ലോ അതിനു സാമാന്യം നല്ല റീഡേഴ്‌സുമുണ്ട്. വായനയിൽ ഒരു വഴികാട്ടി ഉണ്ടായിരുന്നില്ലാത്തതിനാൽ ഞാനും അതൊക്കെ തന്നെ വായിച്ചാണ് വളർന്നത് പക്ഷെ അതെന്റെ ട്ടേയ്സ്റ് അല്ല . അത് മോശമാണെന്നോ മറ്റൊ ഉള്ള അഭിപ്രായം എനിക്കില്ല. പക്ഷെ വളരെ ഭാവനാ ദാരിദ്യം ഉള്ളവരാണ് മലയാളി വായനക്കാർ എന്ന് തോന്നിയിട്ടുണ്ട് അതായത് സ്പൂൺ ഫീഡിങ് പോലെ  ആണെങ്കിൽ വായിക്കും എന്ന പോലെ അവനവനെ വായനയിൽ അപ്ഗ്രഡ് ചെയ്യുന്ന ഒരു ചെറിയ കൂട്ടമേ ഉള്ളൂ എന്ന് തോന്നിയിട്ടുണ്ട് അങ്ങനെ ഉള്ളവർക്ക് തൃപ്തിപ്പെടാൻ അത്തരം സാഹിത്യം ധാരാളം മതിയാകുമായിരിക്കും.

10. പ്ലസ്സിലേക്ക് ഒരു സന്ദേശം ?

പ്ലസ്, പ്ലസ് ആണ് എഫ്ബി യെ ഒക്കെ അപേക്ഷിച്ചു ഇവിടെ നല്ല ഗൗരവമുള്ള ചർച്ചകൾ നടക്കുന്നു. സംവേദനം സാധ്യമാകുന്നു. പ്ലസ് പ്ലസായിരിക്കട്ടെ. ഇവിടെ വെറുതെ കറങ്ങി ഇവിടെ നിന്നുള്ള സന്ദേശങ്ങൾ ഉൾക്കൊള്ളുക എന്നല്ലാതെ ഇവിടേക്ക് താരം മാത്രം സന്ദേശമൊന്നും എന്റെ കൈയിലില്ല

11. താങ്കളുടെ അഭിപ്രായത്തിൽ സാമൂഹികമായി പുരുഷന്മാർ അഭിമുഖീകരിക്കുന്ന ഏറ്റവും വലിയ ഒരു പൊതു പ്രശ്നം എന്താണ് ?


പുരുഷന്മാർ അങ്ങനെ എന്തെങ്കിലും സാമൂഹികമായ പ്രശ്നങ്ങളെ അഭിമുഖീകരിക്കുന്നുണ്ടോ എനിക്കങ്ങനെ തോന്നുന്നില്ല കാരണം ഓരോ പുരുഷനും അവനു വേണ്ടുന്ന കാര്യങ്ങൾ കൃത്യമായി ചെയ്യുന്നുണ്ട്. സമൂഹം അങ്ങനെ ആണല്ലോ സെറ്റ് ആയിരിക്കുന്നത്.യഥാർത്ഥത്തിൽ യാതനകളും പ്രശ്നങ്ങളും അനുഭവിക്കുന്ന ഒരു വിഭാഗം ഇവിടെയുണ്ട് അതിനു പക്ഷെ പുരുഷൻ സ്ത്രീ എന്നിങ്ങനെ തരാം തിരിക്കാൻ ആവില്ല അതിനു ജൻഡർ ഇല്ല എല്ലാവരും പെടും .അതല്ലാതെ പുരുഷന്മാർക്കായി പ്രത്യേക പ്രശ്നങ്ങൾ ഉണ്ടെന്നു ഞാൻ കരുതുന്നില്ല. അതിന്റപ്പുറം ഒരു പ്രശ്നം സൂചിപ്പിക്കണം എന്നാണെങ്കിൽ അതെനിക്ക് തോന്നുന്നു
സമൂഹത്തിനോടുള്ള ഭയം .അവനവനായിരിക്കാനുള്ള ധൈര്യമില്ലായ്മ ഇവയാണെന്ന്



12. ”എഴുത്ത് എനിക്കൊരു മരണവെപ്രാളം പോലെയാണ്. പുറത്താരോ കാത്തുനില്‍ക്കുന്നു വെന്ന പ്രേരണയില്‍ എഴുതിത്തീര്‍ക്കുകയാണ്. കിട്ടാവുന്നത്ര സമയം മടിപിടിച്ചിരുന്നാലേ എഴുതിത്തുടങ്ങാനാവൂ. ലോഹിതദാസ് എന്ന മനുഷ്യനില്‍നിന്നു ലോഹിതദാസ് എന്ന എഴുത്തുകാരനിലേക്കുള്ള കയറ്റം കിട്ടണം. ദോശ ചുടാന്‍ ദോശക്കല്ലു ചൂടായി പതം വരും പോലെ. പിന്നെല്ലാം ഈസിയാണ്. ” ഇത് പണ്ട് ലോഹിതദാസ് പറഞ്ഞതാണ്. ചോദ്യം ഇതാണ്. താങ്കൾക്ക് എഴുത്ത് എന്നാൽ എന്താണ്? എപ്പോഴൊക്കെയാണ് ഒരു എഴുത്തിന്റെ ജനനം ഉണ്ടാകുന്നത് ?

ലോഹിതദാസ് നെ ഒക്കെ ക്വോട്ട് ചെയ്യുന്നു .. ഇതേതോ വൻ എഴുത്തുകാർക്കുള്ള ചോദ്യമാണല്ലോ. എനിക്കുള്ള ചോദ്യമായിട്ട് തോന്നുന്നേയില്ല .  എനിക്കെന്തായാലും എഴുത്ത്  എന്ന് പറയുന്നത് ഏറ്റവും പ്രിയപ്പെട്ട ഒരു പ്രാക്ടീസ് ആണ് പല മനസികാവസ്ഥകൾ ഉണ്ടായിട്ടുണ്ട് അത് പറഞ്ഞു ഫലിപ്പിക്കാൻ എത്രത്തോളം കഴിയുമെന്നറിയില്ല.എങ്കിലും വായുവിൽ പൊങ്ങിപ്പറന്നു പോവും പോലെ,  ശരീരം തനിയെ  ഒരു ടൈപ്‌റൈറ്റർ ആവുന്ന പോലെ ...ഇങ്ങനെ ഒക്കെ പറയാമെന്നു തോന്നുന്നു . 

13. സിനിമ കണ്ടിട്ടോ അല്ലെങ്കിൽ പുസ്തകം വായിച്ചോ മോട്ടിവേറ്റഡായി ജീവിതത്തിൽ എന്തെങ്കിലും കാര്യം പ്രാവർത്തികമാക്കിയിട്ടുണ്ടോ...? ഉണ്ടെങ്കിൽ എന്താണ് ?

ഒരു വ്യക്തിയിലേക്കുള്ള വളർച്ചയിൽ എല്ലാവരെയും പോലെ പുസ്തകങ്ങളും സിനിമയും എന്നെയും സ്വാധീനിച്ചിട്ടുണ്ട് പക്ഷെ അങ്ങനെ എടുത്തു പറയാൻ ഒന്നും ഇപ്പോൾ ഓർമയിൽ വരണില്ല 

14. പ്രണയത്തിനൊരു നിർവചനം? ഒരിക്കലും മറക്കാനാവാത്ത താങ്കളുടെ ഒരു പ്രണയാനുഭവം പങ്കുവെക്കാമോ ?

 ഒരു നിർവചനത്തിൽ ഒതുങ്ങുന്നതല്ല പ്രണയം എന്നാണ് അനുഭവം എങ്കിലും  എല്ലാത്തിൽ നിന്നും സ്വാതന്ത്രമാക്കുന്ന ഒരവസ്ഥ എന്ന് വേണേൽ പറയാം.


 സംഭവം ഇത്തിരി പൈങ്കിളി പരിപാടിയായിരുന്നു   സെക്കൻഡ് ഇയർ ഡിഗ്രി  പഠിക്കുമ്പോ കോളേജിന്റെ പ്ലാറ്റിനം ജൂബിലി ഘോഷയാത്രക്കിടയിലാണ് ഞാൻ ആദ്യം അയാളെ കാണുന്നത് അപ്പോഴത്തെ നമ്മുടെ ഒരു മൈൻഡ് അങ്ങനാണല്ലോ  കണ്ടപ്പോ തന്നെ ഉള്ളിൽ നാലഞ്ച് ബൾബ് കത്തി അപ്പൊ തന്നെ പോയി പ്രൊപ്പോസ് ചെയ്യാൻ ഓർത്തതായിരുന്നു പക്ഷെ വാങ്ങിച്ചോണ്ട് വന്ന  ബൈക്ക്  കൊണ്ട് കൊടുക്കാൻ പറഞ്ഞു  കൂട്ടുകാരൻ അത്യാവശ്യമായി വിളിച്ചത് അപ്പൊ  കൊണ്ട് നടന്നില്ല അന്നവളുടെ കൂടെ ഉണ്ടായിരുന്നത് എന്റെ പ്ലസ്‌ടു ജൂനിയർ കുട്ടി ആയിരുന്നു അവളെ പിടിച്ചു അടുത്ത ദിവസം തന്നെ ആളെ കണ്ടു പിടിച്ചു പക്ഷെ അടുക്കാൻ  പറ്റിയില്ല അയാൾ ഫ്രൻസും ആയി ബിസി അങ്ങനെ രണ്ടാമത്തെ ദിവസം
ജൂനിയറി
നോട് പറഞ്ഞു അയാളെ ഒഇടിച്ചു നിർത്തി പരിചയപ്പെട്ടു അപ്പോൾ തന്നെ ഒരഐലവ്യൂ പെടച്ചു. അയാളുടെ കിളികൾ പറന്നു പോവുന്നത് ഞാൻ കണ്ട്. അതൊരു അടിപൊളി അനുഭവമായിരുന്നു.  

15. പ്രിയതമയുടെ ഏതു സ്വഭാവഗുണമാണ് താങ്കൾക്ക് ഏറെ പ്രിയം? അതുപോലെ താങ്കളുടെ ഏത് സ്വഭാവഗുണമാണ് പ്രിയതമക്കിഷ്ടം? അത് പരസ്പരം തുറന്നു പറഞ്ഞിട്ടുണ്ടോ?

ഞാൻ ഒരുപാടൊക്കെ ആഗ്രഹിച്ചു, പറയാതെ വിടുന്ന ഒരുപാട് സംഗതികൾ ഉണ്ട് അതൊക്കെ പെട്ടെന്ന് പിടിച്ച്‌ മനസ്സിൽ വെച്ച് പിന്നീടൊരിക്കൽ അത്ഭുതപ്പെടുത്തുന്ന ഒരു പരിപാടി അയാൾക്കുണ്ട് , ചാർക്കോൾ പെൻസിൽ ,കാർവിങ് ടൂൾസ് പിന്നെ തബല ഒക്കേം ഇവിടേക്ക് താങ്ങി കൊണ്ട് വന്നു ഞെട്ടിച്ച അനുഭവങ്ങൾ ഉണ്ട്, അതെ പോലെ അത്രയും അലസനും ധൂർത്തനുമായ എന്നെ മേയ്ക്കുന്നതും സാമാന്യം നല്ല സംഗതി ആണെന്ന് തോന്നുന്നു.
എന്റെ ഏതു സ്വഭാവം ആയിരിക്കും അയാൾക്കിഷ്ടം എന്നെനിക്കറിയില്ല മൊത്തത്തിൽ എന്റേത് ഒരു ഡേഞ്ചറസ് ആറ്റിട്യൂട് ആണെന്നാണ് അയാൾടെ അനുഭവം. ഞാൻ ചോദിച്ചിട്ടില്ല അങ്ങനെയൊന്ന്.



16, ഇവരെപ്പറ്റി ആദ്യം മനസ്സിൽ വരുന്നത് ഒറ്റ വരിയിൽ എഴുതുക.

1. പ്രിയ രാജേഷ്
2. മെലോഡി
3. ആഗ്നേയ ഫെമിന
4. രാമചന്ദ്രൻ വെട്ടിക്കാട്
5. രേണുക അരുൺ

1. ടീച്ചർ 
2.ചെറിയകാര്യങ്ങളിൽ സന്തോഷിക്കുന്ന അത് പങ്കു വെച്ച് ഇരട്ടിപ്പിക്കുന്ന ഭക്ഷണപ്രിയൻ ക്യൂട് മാൻ 
3. ക്രിയേറ്റീവ് , അതിനപ്പുറം ഒരു നല്ല മനസ്സിനുടമ 
4 . കൂട്ടുകാരിൽ കൂട്ടുകാരനാവുന്ന  ഫ്രീക്കൻ പയ്യൻ 
5 . ജാഡയില്ലാത്ത ഗായിക 



17, പാചകം ഒരു കലയാണല്ലോ. സ്വന്തമായി പാചകപരീക്ഷണങ്ങൾ നടത്താറുണ്ടോ ? മീൻ കറി വെന്ത ശേഷം ഉപ്പ് ചേർക്കുന്നതാണോ അതോ ആദ്യം തന്നെ ഉപ്പ് ചേർക്കുന്നതാണോ കൂടുതൽ നല്ലത് ?

പാചകം ഒരു കലയാണ് പക്ഷെ ആ കലയിൽ ഞാൻ കലാകാരനല്ല. ഞാൻ ഫുഡി ആയ ഒരാൾ അല്ലാത്തത് കൊണ്ടും ഭക്ഷണം കഴിക്കാൻ എനിക്ക് തൈരോ ഓംലെറ്റോ ചമ്മന്തിയോ ധാരാളമായതിനാലും ആ കലയിൽ കൂടുതൽ ശോഭിക്കേണ്ടി വന്നിട്ടില്ല. എങ്കിലും ആദ്യംതന്നെ ആവശ്യത്തിന് ഉപ്പു ചേർത്താണ് വീട്ടിൽ കറി  വെയ്ക്കുന്നത് പിന്നീട് പോരെങ്കിൽ ചേർക്കാമല്ലോ .

18. ഒരു പ്ലസ് മീറ്റിൽ ഏതു വിഷയത്തെക്കുറിച്ചും സംസാരിക്കാൻ മുഖ്യപ്രഭാഷകനായി ക്ഷണിച്ചാൽ എന്തു വിഷയത്തെക്കുറിച്ചാവും താങ്കൾ സംസാരിക്കുക?

 നമ്മുടെ സമൂഹത്തിന്റെ വികലമായ പൊതുബോധത്തെ കുറിച്ച് എനിക്ക് അനുഭവമുള്ളത് എന്തെങ്കിലും.. 


19. മരിച്ചുപോയ ഒരു കലാകാരനെ/കലാകാരിയെ പുനരുജ്ജീവിപ്പിക്കാനുള്ള ഒരു കഴിവ് താങ്കൾക്ക് കിട്ടിയെന്നിരിക്കട്ടെ... ആരെയാവും താങ്കൾ ജീവിതത്തിലേക്ക് മടക്കിക്കൊണ്ടു വരുന്നത് ?

എഡ്മണ്ട് തോമസ് ക്ലിന്റ് . നമ്മളിപ്പോ ദാലി ,വാൻഗോഗ്, ഫ്രിഡ , മൈക്കലാഞ്ചലോ എന്നൊക്കെ പറയും പോലെ പറയണ്ട പേരായിരുന്നു ക്ലിന്റിന്റേത്. ക്ലിന്റ് വരണം 


20. രണ്ടു വ്യക്തികൾ ചുംബിക്കുമ്പോൾ ലോകം മാറുന്നു എന്നാണല്ലോ കവിഭാഷ്യം. ചുംബനത്തോടുള്ള താങ്കളുടെ സമീപനം എങ്ങനെയാണ്

രണ്ടുപേർ ചുംബിക്കുമ്പോൾ ലോകം മാറുന്നു എന്ന് പറഞ്ഞത് ഒക്ടോവിയോ പാസ് ആണ് 
എന്തായാലും , ചുംബിക്കുമ്പോൾ ചുംബിക്കുന്നവരുടെ ലോകം മാറുന്നുണ്ട്. ചുംബിക്കുമ്പോൾ ഹെവി വോൾട്ടേജിൽ തന്നെ ആവണം എന്ന് ഞാൻ കരുതുന്നു. 

21. ദൈനം ദിന ജീവിതത്തിൽ ഒഴിച്ചുകൂടാനാവാത്ത മൂന്നു കാര്യങ്ങൾ ?
1 .ഞാനെങ്ങനെ ഞാനായി എന്ന് ഓർക്കാതിരിക്കൽ അഥവാ സഖാവ് സീവിയെ ഓർക്കാതിരിക്കൽ  , 
2 .കൂട്ടുകാരിക്ക് ഒരു ടെക്സ്റ്റെങ്കിലും അയക്കാതിരിക്കൽ  
3 .എന്തെങ്കിലും വായിക്കാതിരിക്കൽ , പത്തുമിനിറ്റ് എങ്കിലും ഏതെങ്കിലും ഫിലിം ഓർ സോങ് ഇന്റർവ്യൂ അങ്ങനെന്തെങ്കിലും കാണാതിരിക്കൽ

22. ആരാണീ പ്ലസ്സർ എന്ന ഈ പംക്തിയെപ്പറ്റി എന്താണഭിപ്രായം? നൂറ്റി ഇരുപതാമത്തെ എപ്പിസോഡിൽ അതിഥി ആയി എത്തിയ താങ്കൾക്ക് ചോദ്യകർത്താവിനോടൊരു ചോദ്യം ചോദിക്കാൻ അവസരം തന്നാൽ എന്ത് ചോദിക്കും ?

പംക്തി - ഇത് പൊളിച്ച്- 
എന്റെ ചോദ്യം :-
നൂറ്റിഇരുപതാമത്തെ അതിഥി എന്ന നിലയ്ക്ക് നൂറ്റിഇരുപത്‌ ചോദ്യങ്ങൾ ചോദിച്ചു കളയാം എന്ന് താങ്കൾ ചിന്തിക്കാതിരുന്നത് എന്ത് കൊണ്ടായിരുന്നു ?


23. ആധുനികസമൂഹത്തിൽ കവിതകളുടെ ധർമ്മം എന്താണ്?

ഓരോ വായനക്കാരനും ഓരോ ടേസ്റ്റ് ഉണ്ട് ഏതു തരം കവിതകൾ ആയാലും അത് തേടി വന്നു വായിക്കുന്നവനെ ഏതെങ്കിലും തരത്തിൽ ഉത്തേജിപ്പിക്കുക (അത് പോസിറ്റീവോ നെഗറ്റീവോ ആവട്ടെ ) എന്നതാണ് എന്ന് തോന്നുന്നു അതിനപ്പുറം എന്തെങ്കിലും ധർമ്മം  കവിതയ്‌ക്കോ  ഏതെങ്കിലും ആർട് ഫോമിനോ ഉണ്ടെന്ന്  എനിക്കു തോന്നുന്നില്ല

24. ജീവിതത്തില്‍ ആദ്യമായി ശ്രദ്ധ ഉടക്കിയ സ്ത്രീ ( അമ്മ, ഭാര്യ, സഹോദരി എന്നിവരല്ലാതെ )ആരാണ് ? കാരണം ?

വത്സലകുമാരി ടീച്ചർ. എന്റെ ഓർമയിൽ ഞാൻ കണ്ട കവിതയെഴുതുന്ന ആദ്യത്തെ സ്ത്രീ അവരാണ്. മലയാളം അദ്ധ്യാപിക, അടിപൊളി ആറാം ക്ലാസ് . പക്ഷെ ശ്രദ്ധ ഉടക്കാനുള്ള കാരണം അതല്ല . ക്ലസ്‌റൂമിനെ അവർ അവരുടെ വീടായിട്ടാണ് കണ്ടിരുന്നത്. മിലിറ്ററി ജോലിയുള്ള മകനെ കുറിച്ചും മകളെ കുറിച്ചും ഭർത്താവിനെ കുറിച്ചും വീട്ടിലെ അംഗങ്ങളെ പോലെ ഞങ്ങൾക്കറിയാമായിരുന്നു, ടീച്ചറുടെ സഹോദരന്റെ മകനും അതെ ക്ലാസ്സിൽ ഉണ്ടായിരുന്നു . ഭയങ്കരമായ സ്നേഹമായിരുന്നു കുട്ടികളോട് അതിനു മുൻപും ശേഷവും അത്രയ്ക്ക് കരുതലോടെ സ്നേഹത്തോടെ കുട്ടികളോട് പെരുമാറുന്ന ഒരു അധ്യാപികയെ കണ്ടിട്ടില്ല . ആനുവൽ ഡേ ക്ക് മുഴുവൻ ടേമിൽ ഫസ്റ്റ് ആൻഡ് സെക്കൻഡ് വരുന്നവർക്ക് മെഡൽ കൊടുക്കുന്ന പതിവുണ്ടായിരുന്നു സ്‌കൂളിൽ, അവസാനത്തെ പരീക്ഷയുടെ കൂടി മാർക്ക് ന്റെ അടിസ്ഥാനത്തിൽ കൂടി ആണ് അത് ചെയ്യുക അങ്ങനെ വന്നപ്പോൾ ആ പരീക്ഷയ്ക്ക് എനിക്ക് ഒന്നോര് രണ്ടോ മാർക്ക് കുറവാണ് അതായത് രണ്ടു മാർക്ക് കിട്ടിയിരുന്നെകിൽ രണ്ടാം സ്ഥാനം ഷെയർ ചെയ്യാം അതിനു കൂടെ ഉള്ളത് മേൽപ്പറഞ്ഞ ടീച്ചറിന്റെ സഹോദരന്റെ മകൻ മിഥുൻ ആണ് പക്ഷെ ലിസ്റ്റ് കൊടുത്തപ്പോൾ എന്റേം കൂടി പേരുണ്ടായിരുന്നു അതിൽ. അത്തവണ ഞാനും മിഥുനും കൂടിയാണ് രണ്ടാം സ്ഥാനം ഷെയർ ചെയ്തത്. ടീച്ചർക്ക് തെറ്റുപറ്റിയതല്ല എന്ന് എനിക്കറിയാം എന്നത് മനസ്സിലായിട്ടും വേണ്ടെന്നു വെയ്ക്കാൻ അന്നത്തെ എന്റെ സ്വാർത്ഥത കൊണ്ട് കഴിഞ്ഞില്ല പക്ഷെ എനിക്ക് പകരം ആ ക്ലാസിലെ ആരായിരുന്നാലും ടീച്ചർ അത് ചെയ്യുമായിരുന്നു. ഇന്നിപ്പോ പല അദ്ധ്യാപകരും കുട്ടികളെ ട്രീറ്റ് ചെയ്യുന്ന വിധം വർത്തയാകുമ്പോൾ ഒക്കെയും ടീച്ചറെ വല്ലാതെ മിസ് ചെയ്യും


25. മറ്റെന്നാൾ ലോകം അവസാനിക്കാൻ പോകുന്നു എന്ന് നാളത്തെ പത്രത്തിൽ ഒരു വാർത്ത വന്നു എന്നിരിക്കട്ടെ... അത് വായിച്ച താങ്കൾ ലോകാവസാനത്തിന് മുൻപ് ചെയ്തു തീർക്കാൻ പോകുന്ന കാര്യങ്ങൾ എന്തൊക്കെയായിരിക്കും ?

മറ്റന്നാൾ ലോകം തന്നെ അവസാനിക്കുമ്പോൾ വേണ്ടപ്പെട്ടവർക്കോ മറ്റുള്ളവർക്കോ എന്തെങ്കിലും ചെയ്ത വെക്കാം എന്ന് കരുതുന്നതിൽ അർത്ഥമില്ലല്ലോ കാരണം മറ്റന്നാൾ കഴിഞ്ഞാൽ ആരുമില്ല. പിന്നെ പത്ര വാർത്ത ആണെങ്കിൽ പറയണ്ട ലോകം മുഴുവൻ നെട്ടോട്ടത്തിലാവും ബിന്ദുപണിക്കരെ പോലെ അയ്യോ എന്റെ ഫ്രിഡ്ജ്+ ടീവി+ കാർ അങ്ങനെ അടക്കം പല പല വെപ്രാളങ്ങൾ അപ്പോൾ ഞാനെന്ത് ചെയ്യും ?? എനിക്ക് പക്ഷെ ധൃതിയില്ല എങ്കിലും മേതിൽ പറഞ്ഞത് പോലെ എല്ലാ നഷ്ടങ്ങളും എന്റേതാവാൻ അവസാനം വരെ കാത്ത് നിൽക്കില്ല. പ്രിയപെട്ടവരെ എല്ലാരേം കാണും കെട്ടിപ്പിടിക്കും ഉമ്മവെയ്ക്കും ..എന്തെങ്കിലും പറയാൻ മാറ്റിവെച്ചതോ ബാക്കി വെച്ചതോ ആയതു ആരോടെങ്കിലും ഉണ്ടെങ്കിൽ പറയും. വിളിക്കാൻ പറ്റുന്നവരെ മുഴുവൻ വിളിക്കും , തിരക്കിലും ഫോണെടുക്കുന്നവരോട് പറയും അവസാനത്തിനു മുൻപ് ഞാൻ നിങ്ങളെയെല്ലാം ഓർത്തിരുന്നുവെന്ന് ( ലോകാവസാനത്തിൽ ഇമോഷണൽ ആയി പെരുമാറുന്നത് ഒരു തെറ്റല്ലല്ലോ അല്ലെ? )

No comments:

Post a Comment

time travel

ഇരുമ്പുബോഗികൾക്കു പകരം  ഡെയ്‌സിപ്പൂക്കൾ  ചേർത്ത് വച്ച തീവണ്ടി വരും-  പാളങ്ങളിൽ കൈകൾ കെട്ടി  കള്ളക്കഥകൾ പറഞ്ഞു നടക്കാം  നമ്മെ കടന്ന...