വായുവിൽ വയലിൻ വയിക്കുമോരാൾ 

താഴെ കത്തും മെഴുകുതിരികൾ നോക്കി 

നെടുവീർപ്പിടുന്നു 

അയാൾ താഴെ നോക്കുമ്പോൾ 

തുറന്നു വെച്ച പുസ്തകങ്ങൾ 

തന്റെ നെടുവീർപ്പുകൾ  പിടിച്ചെടുക്കുന്നു 

കാറ്റിൽ തനിയെ 

താളുകൾ മറിയും 'കദാരെ'യുടെ 'പിൻഗാമി'

അരികിൽ ചൂടിനു 

ആവി പറക്കും സമോവർ   

മറിയും പത്രത്താളുകൾ, 

വർത്തമാനങ്ങൾ വർത്തമാനങ്ങൾ  

തേഞ്ഞുപോകുമർക്കൻ നിറം കൊടുത്ത,

മാഞ്ഞുപോകും ജീവൻ കൊടുത്ത   

ചുവന്ന നാടിൻറെ സംഗീതം

അയാൾ അയാൾ നേരെനോക്കുമ്പോൾ  

മേഘങ്ങൾക്കിടയിൽ പറക്കും മീനുകൾ 

അകാശമക്വേറിയം 

പച്ച ചായം ഇളകി പോകും 

ഭൂമിയിലെ നീരാവി 

മരങ്ങൾക്കിടയിൽ ചേർത്ത് പിടിച്ച ചില്ലകളോട് 

പറയും സ്വകാര്യം 

കേട്ടു പറന്ന പക്ഷികൾ 

ചിറകിൽ നിന്നും വീണ ഒറ്റതൂവൽ 

കണ്ടു കൊണ്ട് കണ്ടു കൊണ്ട് 

വായുവിൽ വയലിൻ വായിക്കും  

ഒരാൾ