പിസ്താഷ്യോ ഫ്ലേവറിൽ
എന്റെ വേനല്ക്കാലജീവിതം
തരക്കേടില്ലാത്ത വിധം
തണുപ്പ് പറ്റിക്കൊണ്ടിരിക്കെ
വിപ്ലവകാല ജീവിതത്തിലെ
സ്മൃതിപഥങ്ങളെ ഉഴുതുമറിച്ചു
കൊണ്ട് വന്ന ചിലതരം
അചഞ്ചല വികാരങ്ങളെ
എന്നോ കയറ്റിവിട്ട
കൽക്കരിത്തീവണ്ടി വീണ്ടും
വന്നെന്തിനിത്തരം 
വിനോദങ്ങളിലേർപ്പെടുന്നു
എന്നറിയാൻ വയ്യെങ്കിലും
വന്നവർക്ക് വിചാരങ്ങളിൽ 
കോൺ സൂപ്പ് വിളമ്പി 
സൽക്കരിക്കുമ്പോൾ
നിങ്ങൾ മുറിവുകൾക്കാഹാരം 
വിളമ്പുന്നുവെന്ന് കരുതുന്നത് നിർത്തൂ

നിറതോക്ക് പണ്ട് 
രക്ഷിക്കാതിരുന്ന 
ജനതയിനി ഒരിക്കലും
നിങ്ങളുടെ മുറിവുകളെ
ഉണക്കാൻ 
പോകുന്നില്ലെന്ന് 
ഓർത്ത്കൊണ്ട് വിപ്ലവസൂര്യനെ
താലോലിച്ചു കൊള്ളുക

പക്ഷെ നോക്കൂ
ചിലിയൻ പറവകൾ 
കൊത്തികൊണ്ടുവരുന്ന
സന്ദേശങ്ങൾ 
നിങ്ങളുടെ നിബിഡ-
വനങ്ങൾക്കാശ്വാസമാവുമോ?

അതേ സന്ദേശങ്ങൾ
നിങ്ങളുടെ 
വസന്തങ്ങളെ 
പരിഭാഷപ്പെടുത്തുമോ
എന്നോർക്കാതെ 
പറവകളുടെ 
ഉയരങ്ങളിൽ നിന്ന്
ഓർമകളിലേക്ക് 
എടുത്ത് ചാടാതിരിക്കാൻ
കിണഞ്ഞു ശ്രമിക്കുക
ആത്മസംയമനം
അല്ലലുണ്ടാക്കാറില്ലെന്നറിയാമല്ലോ.