ജിന്നുകളുടെ നഗരം

നിറയെ നിറയെ ഇലകൾ 
നിറഞ്ഞ ചെടികൾക്കരികിൽ 
പോർ വിമാനങ്ങളുടെ 
ഡമ്മികൾക്കിടയിൽ 
ചെമ്പൻ ചുരുൾ മുടിയുള്ള 
പെൺകുട്ടികൾക്കരികിൽ 
കർമ്മനിരതരായ 
യന്ത്രകുഞ്ഞുങ്ങൾക്കരികിൽ 
ഏകനായേകനായിരിക്കവേ 
വിരസതയുമായി മല്ലുപിടിക്കാൻ 
ഇഷ്ടത്തിന് പല ജാതി ജിന്നുകളെ 
സൃഷ്ടിക്കുകയാണ് 
എനിക്കില്ലാതെ പോയ 
ഗപ്പികുഞ്ഞുങ്ങളുടെ പേരിൽ 
ഞാൻ കണ്ടിട്ടില്ലാത്ത 
പാവോ പക്ഷികളുടെ രൂപത്തിൽ 
എന്നെ തൊടാത്ത 
ഹിമാലയൻ പൂച്ച കുഞ്ഞുങ്ങളായി 
ഞാൻ തൊടാത്ത 
ഡാൽമേഷ്യൻ കുഞ്ഞുങ്ങളെ പോലെ 
ആറായിരമാറായിരം 
മിന്നാമിനുങ്ങുകളായി 
ജിന്നുകൾ ജിന്നുകൾ വന്നിറങ്ങി-
യൊരു സുന്ദര നഗരതീരമാവുകയാണ് 
മാന്ത്രിക വടി വീശി കൈ കുഴഞ്ഞെങ്കിലും 
വിരസതയതാ കാലിൽ വാലുരുമ്മി 
കുറുകി നാഗരാതിർത്ഥി കടന്നു പോയി 
ഇതായിപ്പോൾ നഗരമതിന്റെ ലഹരിയിയുടെ തിരകളിലേക്ക് 
ജിന്നുകളുടെ തോളിലേറി നീന്തുന്നു
ഹായ് ..!