ഒരു കടുത്ത അസ്വസ്ഥതയുടെ മേലേക്ക് 
ചായുന്ന ചുവന്ന പട്ടത്തിന്റെ 
നൂലിൽ പിടിച്ചു നിൽപ്പാണ് 
നിഴലിന്റെ ഭൂപടത്തിൽ 
ഒരു പെൺകുട്ടി.
ഏറ്റവും ഭംഗിയുള്ള മേഘങ്ങളെ
ഓർമ്മിപ്പിക്കും വിധം
അവളുടെ കീറിയ കുപ്പായം.
കീറിയ ഭാഗങ്ങൾ അവൾ
തുന്നാതെ തുറന്നിട്ടിരിക്കുന്നു
അതിലൂടെ ആകാശത്തിന്റെ
നീലിമ കാണിക്കുന്നു.
ടൈയാൻഷൻ പർവ്വതനിരകൾ കാണുന്നു.
മഞ്ഞയോർക്കിഡ്‌ പാടങ്ങൾ കാണുന്നു.
കീറിയ കുപ്പായഭാഗങ്ങളിലൂടെ
അവളിലേക്ക് നിറയെ
ലില്ലിപ്പൂക്കൾ വാരി നിറയ്ക്കണം
എന്നോർത്തു നിൽപ്പാണ് ഞാൻ.
പറയൂ
മേൽപ്പറഞ്ഞ അസ്വസ്ഥകൾക്ക്
മറ്റൊരു പേര് പറയൂ..