വർഷ മാസത്തിലെ
അവസാന ദിനങ്ങളേ
നിങ്ങളിലാഘോഷങ്ങളിൽ
കാത്തു വെയ്ക്കാൻ
ഓർത്തു വെയ്ക്കാൻ
ഞാനൊരു കൂട്ടം സമ്മാനങ്ങൾ
തുന്നിവെയ്ക്കുന്നുണ്ട്
എന്ത് വേണം
എങ്ങനെ വേണം എന്നൊക്കെ
ധാരണകളുടെ നടുവിലാണ്
കുഴങ്ങിപ്പോകുന്നതെന്നതിനാൽ
ധ്വനിപ്പിക്കാതിരിക്കാൻ മാത്രം
വസന്തത്തിനു ശേഷം
കരിഞ്ഞു പോകുന്ന പൂക്കളാവാം
മാറിപ്പോകുമ്പോൾ
മറന്നു പോകുന്ന മണങ്ങളാവാം
അനാവശ്യം പോലെ
ഉപേക്ഷിക്കാൻ പറ്റുന്ന നോട്ടങ്ങളാവാം
പണ്ടു കൊണ്ടുതരാമെന്നു പറഞ്ഞ
തെന്നലുകളാവാം
എന്തെന്തു ചന്തമായാലും കുന്തമായാലും
പ്രേമം പൊതിഞ്ഞു തരുന്നതായതിനാൽ
സമ്മാനങ്ങളാണ് എന്ന് കരുതുക
സമ്മാനങ്ങളാണ് എന്ന് കരുതുക
സൽക്കാരത്തിനും
സന്തോഷത്തിനും ശേഷം
എടുക്കാൻ മറന്നാലുമില്ലെങ്കിലും
എടുത്തുവെയ്ക്കാൻ പോലും
ബാക്കി നിൽക്കാത്ത വിധം
അലിഞ്ഞു പോകുന്ന സമ്മാനങ്ങൾ
സമ്മാനങ്ങൾ തന്നെയെന്നു-
കരുതുക.
