സഖാവ് പകൽ

ഒരു പകൽ 

നീണ്ടു കിടക്കുന്നുവെന്ന് പറയാം 

6 മണിയിൽ നിന്ന് 

6 മണിയിലേക്ക് 

110 ഡോളർ ദിവസക്കൂലി സഹിതം 

അങ്ങനെയങ്ങനെ നീണ്ടു കിടക്കുകയാണ് 

അവധി ദിനങ്ങളോഴികെ 

അനവധി ദിനങ്ങളിൽ  

തൊഴിലില്ലായ്മയാണ് 

തൊഴിൽ 

അതിന്റെ പേരിലാണ് 

പരാമർശിക്കപ്പെട്ട പണം 

അതുകൊണ്ട്  തീൻ മേശയിൽ 

തിരക്കു കൂടുന്നു 

ഹാഹഹ 

ചായക്കോപ്പയിൽ കൊടുങ്കാറ്റ് 

മദ്യക്കുപ്പിയിൽ 

എവിടെയും കാണാത്ത ശലഭങ്ങൾ 

മഴവില്ലിനു താഴെ മേഘങ്ങൾ 

ഒരു രാത്രിക്ക് ശേഷം ഓർമയിൽ 

വരവേ വരാത്ത മുഖങ്ങളെ 

തപ്പിയെടുക്കുന്നത്  മാത്രമാണ് 

മറ്റൊരു തൊഴിൽ  

വിരസമല്ലൊട്ടും  

നീണ്ടു കിടക്കുന്നു  അതെ  പകൽ 

എന്നിട്ടും വന്നില്ല 

ഒരു പകലിൽ കാണാൻ 

വരണമെന്നൊരു തോന്നൽ 

അടുത്തിടെ 6 മണി മുതൽ 6 മണി വരെയുള്ള 

അതെ പകലിനിടയ്ക്ക് 

ഒരു കാലത്തെ  ആരോ ഒരാൾ 

കടന്നു വന്നു ചോദിക്കുന്നു 

ഒരു മുഴുവൻ പകലുണ്ടായിട്ടും 

അസ്തമയങ്ങൾക്ക്  വേണ്ടി 

നീയെനിക്കൊന്നും  പറഞ്ഞു തന്നില്ല 

ഒരു പകലു  പറന്നു പോയിട്ടും 

ഒരു പറവ പോലും എനിക്ക് വേണ്ടി 

കാത്തു നിന്നില്ല 

എന്നൊക്കെ ചോദിച്ചു കേട്ടു 

വീണ്ടും പകലു പോൽ 

വിളറി വെളുത്തുപോയ് 

ലേശം ബുദ്ധിമുട്ടായി  

അവിചാരിതമായി മുഖമൊരു നഗരമായി  

നഗരത്തിൽ തിരക്ക് വർദ്ധിക്കുന്നു 

വാഹന മുഖരിതമായൊരു നഗരം  

വല്ലാതെ വല്ലാതെ വേഗത്തിൽ വരുന്നു 

നഗരങ്ങളിലേയ്ക്ക്  നോക്കാതെ പോവാം 

എന്നുമുണ്ട് 

6 മണി മുതൽ 6 മണി വരെ 

നീണ്ടു നീണ്ടു കിടക്കുന്നുണ്ട് 

മറ്റൊന്നും വന്നെയില്ലോർമയിൽ 

വീണ്ടുമാ പകല് പാഞ്ഞു പോന്നു 

അപ്പോഴെല്ലാം പറഞ്ഞപോലെ 

എന്ന് പോലും പറയാതെയാണ് പോന്നത്  

ഒന്ന് സമാധാനിക്കാമായിരുന്നു എന്ന് പോലും 

പറയാമായിരുന്നു ; പറഞ്ഞില്ല  

ഇതാണ്  

ആദ്യമേ ഞാൻ പറഞ്ഞതല്ലേ 

വീണ്ടുമൊരു പകൽ 

നീണ്ടു കിടക്കുന്നുവെന്ന് 

പറയാമെന്ന് !!